Pedaqoji ixtisaslarda təhsil alan tələbələrin müəllimlik peşəsinə münasibətləri: Region universiteti nümunəsində

Bu tədqiqatın məqsədi, regionda fəaliyyət göstərən universitetin pedaqoji ixtisaslarında təhsil alan tələbələrin müəllimlik peşəsinə münasibətlərini öyrənməkdir. Tədqiqatda, region universiteti nümunəsində pedaqoji ixtisaslarında təhsil alan tələbələrin müəllimlik peşəsinə dair münasibətlərini öyrənməyi və bu münasibətlərin cinsiyyət, qəbul balı, təhsil aldıqları ixtisas və ailədə müəllimlik peşəsinə sahib olan şəxsin olub-olmaması dəyişkənlərinə görə statistik olaraq əhəmiyyətli şəkildə fərqlilik göstərib-göstərmədiyini müəyyən etmək məqsədi qoyulduğu üçün kəmiyyət tədqiqat metoduna daxil olan anket sorğusundan istifadə edilmişdir. Tədqiqat zamanı məlumatları toplamaq üçün, demoqrafik göstəriciləri ilə bağlı suallar ilə birlikdə, validliyi və etibarlılığı Üstüner (2006) tərəfindən yoxlanılmış “Müəllimlik Peşəsinə Münasibət (Öğretmenlik Mesleğine Yönelik Tutum Ölçeği)” adlı 34 maddədən ibarət beşli qiymətləndirmə şkalasında istifadə olunmuşdur. Tədqiqatda, 2023-2024-cü akademik ilində regionda fəaliyyət göstərən universitetdə təhsil alan 385 nəfər müəllim namizədi iştirak etmişdir. Məlumatların təhlili üçün, müstəqil testi, tək yönlü varyans (ANOVA) analizlərindən istifadə olunmuşdur.
Tədqiqatın nəticələrinə əsasən, müəllim namizədlərinin müəllimlik peşəsinə münasibətinin ümumi olaraq “yüksək” olduğu müəyyən olunmuşdur. Bundan əlavə, müəllim namizədlərinin müəllimlik peşəsinə münasibətlərində qəbul balı və ailədə müəllimlik peşəsində şəxsin olub-olmaması dəyişkənlərinə görə statistik olaraq əhəmiyyətli fərqlilik müəyyən olunmamışdır. Lakin müəllim namizədlərinin peşəyə münasibətləri cinsiyyət dəyişkəni və təhsil aldıqları ixtisas baxımından statistik olaraq əhəmiyyətli fərqlilik göstərmişdir.