Azərbaycan orta ixtisas təhsilində səriştə əsaslı tədrisin tətbiqi
Date Issued
2026-07-07
Author(s)
Əliyeva, Kəmalə
ADA Universiteti
Abstract
Araşdırma səriştə əsaslı tədrisin Azərbaycan orta ixtisas təhsili müəssisələrində tətbiq vəziyyətini araşdırır. Tədqiqatın məqsədi Azərbaycan orta ixtisas təhsilində səriştə əsaslı tədrisin tətbiq səviyyəsini və tətbiqində qarşıya çıxa biləcək maneələri müəyyən etməkdir. Araşdırmada qarışıq metoddan istifadə edilmişdir. Məlumatlar Bakı şəhərində yerləşən dövlət kolleclərindən birində müxtəlif kafedralar üzrə fəaliyyət göstərən müəllimlərdən əldə edilmişdir. Kəmiyyət dataları Likert şkalalı onlayn sorğu, keyfiyyət məlumatları isə yarı-strukturlaşdırılmış müsahibələr vasitəsilə toplanmışdır. Onlayn sorğu üzrə toplanan məlumatlar təsviri statistik metodlardan istifadə etməklə Microsoft Excel proqramında, müsahibələrdən toplanan məlumatlar isə tematik analiz üsulu ilə təhlil edilmişdir. Alınan nəticələr Azərbaycan orta ixisas təhsili üzrə normativ sənədlərlə qarşılaşdırılaraq göstərilmişdir. Təhlil zamanı kəmiyyət dataları vasitəsilə aydın olmayan bəzi məqamlar keyfiyyət nəticələri vasitəsilə aydınlaşdırılmışdır. Araşdırmanın nəticəsi göstərir ki, təlimin strukturlaşdırılması, səriştələr və öyrənmə nəticələri, təcrübələrin təşkili üzrə maddələr tələb olunan standartları əhatə edir. Lakin səriştələrin ölçülməsi üçün aydın meyarların olmaması, müəllimlər üçün təlimlərin məhdud olması, avadanlıq çatışmazlığı və tədris metodlarından istifadə zamanı maneələr müşahidə olunur.